Այսօր Եղիշե Չարենցի ծննդյան օրն է

ՄԻՋՆԱԴԱՐՅԱՆ ԿԱՑԻՆ 

Ես ներշնչված արեգակով

Տենչում էի այգաբացին,

Սակայն եղավ նա մեզ համար

Միջնադարյան սրած կացին:

Եվ գլուխներ թռան պայծառ - 

Կացնի զարկից այդ մահաբեր,

Արյունատենչ ու արնավառ

Դահիճը իր գահին է դեռ:

Նա մորթոտված գլուխների 

Ուղեղներն է միայն ծամում,

Եվ մոլեգնում է վիթխարի

Մեր երկրին դառած սամում: 

Օ, մորթոտված արեգակներ,

Խավարեցիք հորիզոնում,

Ձեր բախտակից պոետը՝ ձեր

Բանտի մեջ ձեզ երգ է ձոնում:

Դուք ամենքով էլ դարավոր

Դարի շնչով էիք ապրում,

Դարն եղավ ձեզ հուղարկավոր

Եվ նզովք է ձեզ ուղարկում,

Քանզի դեռ կա դահիճն ագահ

Արյունատենչ ու վիթխարի,

Կառափներով բարձրացած գահ՝

Դառած կացին միջնադարի:

Եվ այդ կացնով միջնադարյան

Արեգակներ գլխատվեցին,

Արևները, ավաղ, չկան, 

Հորիզոնները մթնեցին: 

                 1937, բանտ