ԳՐՔԻ ՏՈՆ՝ ՆՎԻՐՎԱԾ ԹՈՒՄԱՆՅԱՆԻ ԾՆՆԴՅԱՆ 145-ԱՄՅԱԿԻՆ

Հայաստանի գրողների միությունը արդեն յոթ տարի է Հովհաննես Թումանյանի ծննդյան օրը՝ փետրվորի 19-ը, հռչակել է գիրք նվիրելու օր: Տարեցտարի աճում է Գրքի տոնի հանրային հնչեղությունը: Գրատները, գրադարանները, գրական ակումբներն ու մշակութային այլևայլ կառույցներ ակտիվորեն օգտագործում են առիթը, որպեսզի ձգողական դաշտ ստեղծեն՝ ևս մեկ անգամ հանրայնացնելու գրքրեը, դրանց ընթերցանությունը, նպաստելու գրքի հանդեպ դրական վերաբերմունքի աճին:

Ա.Բակունցի տուն-թանգարանին կից գործող ՄԻՐՀԱՎ գրական խմբակը փորձեց նոր շունչ, նոր լիցք հաղորդել գիրք նվիրելու խորհրդանշական օրվան՝ հանդես գալով ուշագրավ նախաձեռնություններով: Գորիսի հիմնական և ավագ դպրոցների աշակերտության շրջանում նախապես հայտարարվեց էսսեների մրցույթ՝ <<ԻՄ ՍԵՂԱՆԻ ԳԻՐՔԸ>> խորագրով: Այնուհետև Գորիսի Գուսան Աշոտի անվան մշակույթի կենտրոնի գրադարանի հետ ծրագրվեց <<ՆՎԻՐԻՐ ԳԻՐՔ ԳՐԱԴԱՐԱՆԻՆ>> կոչով բարեշահ ակցիա. գրադարանի ֆոնդը հարստացնելու նպատակով փետրվարի 17-21-ը հայտարարվեց գրքի նվիրատվության հնգօրյակ:

Վերոնշյալ ձեռնարկների արդյունքները ամփոփվեցին և լուսաբանվեցին փետրվարի 21-ին՝ Գուսան Աշոտի անվան մշակույթի կենտրոնի դահլիճում տեղի ունեցած հանդիսության ժամանակ,  որին ներկա էին Գորիսի քաղաքապետ Նելսոն Ոսկանյանը, քաղաքապետարանի կրթության և մշակույթի բաժնի վարիչ Արմինե Հովակիմյանը, ՀԳՄ Սյունիքի գրողների միության նախագահ Արկադի Ծատուրյանը, գրողներ, մտավորականներ, ուսուցիչներ, Գորիսի մշակութային կառույցների ղեկավարներ, աշակերտներ, ուսանողներ:

Էսսեների մրցույթի 15 մասնակիցներից առաջին կարգին արժանացավ Գորիսի թիվ 2 հիմնական դպրոցի 5-րդ դասարանի աշակերտ Գոռ Արզանյանը, երկրորդ կարգը զբաղեցրեց Ա.Բակունցի թիվ 1 ավագ դպրոցի 7-րդ դասարանի աշակերտուհի Նանե Կոստանդյանը: <<Ամենաինտելեկտուալ էսսե>> անվանակարգի հաղթող ճանաչվեց թիվ 4 ավագ դպրոցի 12-րդ դասարանի աշակերտուհի Շուշաննա Առուստամյանը: Պատանի գրքասերներին պատվոգրեր և մրցանակներ հանձնեցին Ա.Բակունցի տուն-թանգարանի տնօրեն Վարդան Սարգսյանը և ՄԻՐՀԱՎ գրական միավորման ղեկավար Թեհմինա Մարությանը: Առաջին տեղի համար մրցանակ էր սահմանված Թումանյանի մեծադիր ու շքեղակազմ հատընտիրը, երկրորդ տեղի համար՝ Թումանյանի ստեղծագործությունների աուդիոգիրքը՝ թողարկված Երևանի <<Բյուրոկրատ>> գրախանութի կողմից: Մրցույթի երկու մասնակիցներ՝ թիվ 2 հիմնական դպրոցի 7-րդ դասարանի աշակերտուհի Սիրանուշ Սարգիսջանյանը և Ա.Բակունցի անվան թիվ 1 ավագ դպրոցի 7-րդ դասարանի աշակերտուհի Լիլիթ Տատինցյանը, պարգևատրվեցին շնորհակալագրերով: Շնորհավորելով պատանի գրքասերներին՝ Ա.Բակունցի տուն-թանգարանի տնօրեն Վ.Սարգսայնը կարևորեց նման միջոցառումների ու ակցիաների առկայությունը, որոնք անպայման կնպաստեն գրքի դերի ու նշանակության  բարձրացմանը, ընթերցանության զարգացմանը: 

<<Նվիրի'ր գիրք գրադարանին>> ակցիայի արդյունքում գրադարանին նվիրաբերվեց շուրջ 100 գիրք: Գրադարանային բաժնի վարիչ Զոյա Գալստյանը իր խոսքում շնորհակալություն հայտնեց գրական խմբակի անդամներին՝ մշակութանվեր ու հայրենանվեր գործի համար, ինչպես և բոլոր այն անձանց, ովքեր արձագանքել են ՄԻՐՀԱՎԻ ակցիային՝ գիրք նվիրաբերելով իրենց հայրենի քաղաքի գրադարանին: <<Կարծում եմ՝ այս շարժումը մեր քաղաքում ավանդույթ կդառնա և շարունակական կլինի>>,-նշեց Գալստյանը: 

Հանդիպման տպավորիչ մասերից էր մեծ բանաստեղծի ծննդյան 145-ամյակին նվիրված <<Գիրքը Հովհաննես Թումանյանի կյանքում>> խորագրով գրական հանդիսույթը, որը հոգևոր հարուստ լիցքեր պարգևեց ներկաներին և ամբողջացրեց տոնական մթնոլորտը: 

Հանդիսության վերջում ելույթներ ունեցան և Գրքի տոնի շուրջ հուզառատ տպավորություններ կիսեցին  Գորիսի քաղաքապետ Նելսոն Ոսկանյանը, ՀԳՄ Սյունիքի մասնաճյուղի նախագահ, գրող Արկադի Ծատուրյանը, բանաստեղծ Լևոն Սահակյանը և ուրիշներ: 

Առաջարկում ենք դիտել Գորիսի <<ԼԱՍՏ>> հեռուստաընկերության պատրաստած տեսանյութը