Դեկտեմբերի 3-ին լրացավ հայ մեծանուն արձակագիր Սերո Խանզադյանի ծննդյան 98-րդ տարելիցը: Հիշատակարժան օրվա առթիվ գրողի հայրենի առանձնատանը տեղի ունեցավ գրական հանդիսություն, որը կազմակերպել էր Ակսել Բակունցի տուն-թանգարանին կից գործող ՄԻՐՀԱՎ գրական խմբակը:
Խանզադյանի հայրենի տունն իր հյուրընկալ հարկի տակ էր մեկտեղել բազմաթիվ մտավորականների, գրողների, մշակութանվեր ու գրականասեր մարդկանց:
Ողջունելով հյուրերին՝ ՄԻՐՀԱՎ գրական խմբակի ղեկավար Թ.Մարությանը նշեց. <<Խորհրդանշական է, որ գրական այս հանդիպումն ու ցերեկույթը տեղի է ունենում հենց Խանզադյանի հայրենի հարկի տակ, որտեղ իսկապես թևածում է գրողի շունչը և հորդորում պահպանել-շենացնել այդ սրբատեղին, դարձնել նրա անվանն ու գործին արժանի մշակութային օջախ>>: Նա շեշտեց Խանզադյանի ստեղծագործության բարձր արժեքայնությունը, ստեղծագործություն, որ <<մի ամուր օղակ դարձավ ազգային ոգեկերտման ճանապարհին>>:
Շնորհավորելով Ս.Խանզադյանի օրհնված ծնունդը` գրողի տուն-թանգարանի վարիչ Արմանուշ Բակունցը ցանկություն հայտնեց, որ Խանզադյանին նվիրված միջոցառումները ավելի հաճախադեպ լինեն, և <<առանձնատան սրահները լցվեն գրողի իմաստուն զրույցներով, նրա մասին պատմող կենդանի հիշողությունններով>>:
Միջոցառումը հագեցած էր խանզադյանական տպավորիչ ընթերցումներով, ասմունքով, ինքնապատումային սրտառուչ էջերի, հուշազրույցների, ստեղծագործական յուրահատկությունների վկայակոչումներով, ինչպես նաև գուսանական երգերի փայլուն կատարումներով: Հանդիսույթը հիշատակի ուրույն խնկարկում էր և գրական հարուստ ներշնչանքներ պարգևեց ներկաներին՝ ամբողջացնելով Խանզադյանի ստեղծագործական ու մարդկային նկարագիրը:
Ներկաները հույս հայտնեցին, որ միջոցառումը գեղեցիկ ավանդույթ կձևավորի գրական դաշտում և խթան կհանդիսանա՝ Խանզադյանի տուն-թանգարանը դարձնելու գրական սպասված հանդիպումների ու մշակութային տարատեսակ միջոցառումների կենտրոնատեղի:
Комментариев нет:
Отправить комментарий